Nesthy Petecio, nakastrek iti semifinal ti boksing, sigurado a nakayalaten iti medalia kalpasan ti panangatiwna iti taga-Colombia

Philippines' Nesthy Petecio (red) and Colombia's Yeni Marcela Arias Castaneda fight during their women's feather (54-57kg) quarter-final boxing match during the Tokyo 2020 Olympic Games at the Kokugikan Arena in Tokyo on July 28, 2021. (Photo by Luis ROBAYO / AFP)

Ni KRISTEL SATUMBAGA-VILLAR

Inabak ni Nesthy Petecio ti Filipinas ni Yeni Marcela Arias Castañeda ti Colombia tapno makadur-as iti semifinal ti boksing iti kategoria a women’s 54-57 kg iti Tokyo Olympics ita a Mierkoles, Hulio 28.

Da Nesthy Petecio (kanawan) ti Filipinas ken Yeni Marcela Arias Castañeda (kanigid) ti Colombia bayat ti labanda iti women’s featherweight class (54-57kg) quarter final iti boksing. (AFP)

Nagun-od dagiti nabibileg a danog ni Petecio ti yaanamong dagiti hurado a tallo kadagitoy ti nangited iti iskor a 29-28 ken dua ti nangipaay iti 30-27 a pabor amin kenkuana. 

Daytoy a panangabak ti nangipasigurado nga addaanen iti medalia ni Petecio, ken dua laengen a panangabak  ti masapulna  tapno masukdalna ti maikadua a balitok a medalia iti Olympics para iti Filipinas, kalpasan a nayalat ni Hidilyn Diaz ti umuna iti weightlifting iti daytoy met laeng nga edision ti nasao a paay-ayam iti Tokyo.

Babaen pay daytoy a balligi ni Petecio, sigurado a nasursuroken ngem maysa a medalia ti mayawid ti pagilian iti Olympics manipud iti edision daytoy iti Los Angeles idi 1932.