Petecio, inatiwna ti nataytayag nga Italiana tapno makagteng iti finals ti boksing

Ni KRISTEL SATUMBAGA-VILLAR

Inatiw ni Nesthy Petecio ti Filipinas ti nataytayag a kalabanna a ni Irma Testa ti Italia tapno makastrek iti laban para iti balitok a medalia iti boksing iti kategoria a featherweight (54-58kilo) iti Tokyo Olympics, itay Sabado, Hulio 31.

Ni Nesthy Petecio ti Filipinas kalpasan ti panangatiwna ken ni Irma Testa ti Italy iti semi-final a laban dagitoy iti dibision a featherweight (54-57 kilo) iti Tokyo 2020 Olympic Games iti Kokugikan Arena iti Tokyo itay Sabado, Hulio 31, 2021. (AFP)

Nangabak ni Petecio babaen ti split decision a 4-1 wenno uppat a hurado ti pabor iti boksingera a taga-Davao para iti iskor a 29-28 idinto a 28-29 ti naalana iti maysa pay.

Ti balligi ti nangitunda ken ni Petecio a lumaban para iti balitok kontra ken ni Sena Irie ti Japan.

Umas-asidegen ni Petecio iti gundaway nga agbalin a maikadua a Filipino a makagun-od iti balitok a medalia iti Tokyo Olympics kalpasan a nayalat ni Hidilyn Diaz a maysa a weightlifter ti kaunaan.

Iti daytoy a panagballigi ni Petecio, isu ita ti umuna a Filipino iti tay-ak ti boksing a lumaban para iti balitok a medalia iti Olympics manipud limmaban ni Onyok Velasco iti 1996 Atlanta Games. Iti nasao a laban, inyalat ni Velasco ti medalia a pirak (silver) iti panangpadsona iti kalabanna a taga-Bulgaria.

Kinuna ni Petecio  a dinengngegna a nalaing ti panangbaliw dagiti coach-na iti plano gapu iti saan a nagballigi a Plan A iti umuna a rikus.  Gapu daytoy iti kinaatiddog ti magaw-at ti kalabanna.

Iti maikadua a rikus, inatakar nga inatakar ni Petercio ti kalabanna.

Inako ni Petecio a naburiboran iti panangabak ti kalabanna iti umuna a rikus iti laksid a mariknana a napigpigsa ngem iti Italiana.

(Damag manipud iti Manila Bulletin.)