Sektor dagiti pribado a pagadalan, agnguynguy-a iti panagsuek ti bilang dagiti agad-adal iti 66% itoy a panawen ti pandemia

Ni MERLINA HERNANDO-MALIPOT
Ladawan manipud iti Unsplash

Maibatay iti datos ti Departamento ti Edukasion agingga itay Septiembre 13 a panangrugi ti klase, mapan a 1.443 a million nga estudiante laeng ti nagenrol kadagiti pribado a pagadalan, bimmaba iti 57 a porsiento manipud iti 3.376 a milion iti SY 2020-21, ken nababbaba iti 66 a porsiento manipud iti 4.305 a milion a nagenrol idi SY 2019-20.

Iti nagtipon a pakaammo da Coordinating Council of Private Educational Associations (COCOPEA) managing director Joseph Noel Estrada ken COCOPEA chairman ken presidente ti Philippine Association of Colleges and Universities (PACU) Dr. Anthony Jose Tamayo, kunada a saanen a mangnamnama dagiti pribado a pagadalan iti dakkel a mainayon nga agenrol gapu ta nangrugin ti klase kadagiti eskuela ti gobierno ken adu kadagiti estudiante manipud kadagiti pribado a pagadalan ti manamnama nga umakar kadagiti eskuela a para iti publiko.

Iti maysa a surbey ti COCOPEA  a nakipartisiparan ti nasurok a 250 a kameng a pagadalan, naammuan a nasurok a 80 a porsiento kadagiti simmungbat ti agkuna a “ti kinarigat ti biag ti makaigapu iti yaakar dagiti estudiante manipud kadagiti pribado a pagadalan kadagiti pagadalan a para iti publiko, ken kadagiti unibersidad ken kolehio nga imatonan ti turay.”

Tapno makapagtuloy ti panagserbi dagiti pribado a pagadalan, mapan met a 71 a porsiento kadagiti simmungbat a pagadalan ti mangpampanunot ti panangipakatda iti wagas nga “awan trabaho, awan sueldo” (“no work, no pay”) idinto a 64 a porsiento ti agkuna a mabalin nga agkissayda iti empleadoda.  

Naammuan pay iti surbey a mapan met a 55 a porsiento kadagiti simmungbat a pagadalan ti mangpampanunot a nasaysayaat no agserrada laengen. No matuloy daytoy a panggep, mairamanen dagitoy a pagadalan kadagiti 865 a pribado a pagadalan a nagserra itay napalabas nga School Year.

(Manipud iti Manila Bulletin.)