Ni CARLO TERRADO
Inyalat ni Carlo Biado, 37, tubo ti La Union ngem agnaeden iti Muntinlupa City, ti maysa kadagiti kangrunaan a titulo iti ay-ayam a pool iti sangalubongan babaen ti panangatiwna ken ni Aloysius Yapp ti Singapore idi Sabado (Domingo iti Filipinas) ken nangyawidanna iti US Open Pool Championship a naangay iti Harrah’s Resort iti Atlantic City, New Jersey.
Maab-abak kontra ken ni Yapp iti makunkuna a race-to-13 final, nakaaramid ni Biado iti bukodna a panglakagan ket inlugesna ni Yapp babaen ti panangbukbukodna iti simmaruno a 10 racks a gapu met ti nangyawidanna iti Barry Behrman trophy, ti green jacket a mangipaneknek nga isu ti kampeon, ken ti cash prize-na a $50,000 (P2.5-milion).
Maysa a dati a golf caddie, nagbalin kalpasanna ni Biado a world 9-ball champion, World Games winner, ken multi-time Southeast Asian Games gold medallist.
(Manipud iti Manila Bulletin.)
