FDA, binallaaganna ti publiko kontra kadagiti peke nga agas a mailaklako babaen ti internet

Ni JHON ALDRIN CASINAS

Binallaagan ti Food and Drug Administration (FDA) ti publiko itay Lunes, Okt. 4, iti dida koma panaggatgatang kadagiti peke nga agas a mailaklako babaen dagiti nadumaduma a wagas a pakairamananen ti internet (online).  

Impaulog ni FDA Director-General Enrique Domingo ti ballaag gapu iti dumakdakkel a panagkasapulan kadagiti agas gapu met iti kaadda ti pandemia. Inyun-unay ni Domingo a kangrunaan koma a liklikan dagiti umili ti aggatang iti agas babaen dagiti chat groups nga agididiaya iti agas nga agtungpal met laeng iti scams wenno panangballaibo.

“Kinukuha lang yung pera, pagkatapos wala namang gamot na makukuha,” kinuna ni Domingo.

Innayon ni Domingo nga addan dagiti nasamsamda a a counterfeit medicines (natulad nga agas) a mabalin a makadangran laeng kadagiti agaramat kadagitoy.

“Ang gamot ay maaari lamang bilhin sa mga licensed outlets,” kinuna ni Domingo a kayatna a sawen, kadagiti laeng ospital wenno kadagiti lisensiado a botika.

(Manipud iti Manila Bulletin.)