30-kadapan a higante a Kayo ti Paskua, nagangtan

Ni FELIX D. CUNTAPAY, JR.
Ti higante a Kayo ti Paskua iti uneg ti SM Center Downtown, Tuguegarao City. (Rinetrato ni Felix Cuntapay, Jr.)

TUGUEGARAO CITY- Pormal a nagangtan ti 30-kadapan a higante a Kayo ti Paskua iti SM Center Downtown itoy a siudad idi rabii ti Sabado (Nob. 6).
Malaksid iti Kayo ti Paskua, kaabayna ti dakkel a gift box a simbolo ti ayat ken panagsisinnaranay.
Makita pay iti lugar dagiti dumerosas ken kolor-balitok a bola ti Paskua ken dagiti gazebo ken reindeers.
Sakbayna, nangyawat iti regalo ti mall iti kallugong ken boots para kadagiti napili a 4Ps beneficiaries a mannalon iti siudad a kas paset ti mision ti kompania a tumulong kadagiti agkasapulan, kinuna ni Assistant Mall Manager Romel Uy.
Impakaammo pay ni Uy a bakunado aminen nga empleado ti mall tapno masigurado nga adda proteksionda ken dagiti kustomer.
Silulukat ti Christmas Village agingga iti Enero 2022.