Dua a Daniw ni HONOR BLANCO CABIE

1

dakay a nakibalbalubal ‘di

dumupir tropa ti amerika,

dakay nga annak maingel a puli,

itakderyon, nagbungan parmata.

nalabit a sinurotsurotyot’

bittag ken bilin ni aglipay* ngem

ammok adda met kadakay tugot

ni natured nangbuangay ‘toy raem.

iti ballasiw pannakigubat —

dadduma naiwalwalang pay dana —

barangayyo nagilin, nagrimat

nangted iti indayon agdama.

kaduaentay kailian nga agdir-i,

nagilin ti pinili ti puli.

*rdo. padre gregorio aglipay, taga-batac,

dinutokan ni emilio aguinaldo a bikar heneral

ti rebolusion idi gubat filipino ken amerikano

idi agtapog ti siglo 1900.

2

nangngegmo met, atanud, aweng ‘diay

tangguyobda? naiduma a rambak

‘toy a kasangay, ay! napno’t ragsak:

aginnatkan, intay makidar-ay.

sangagasut ket duan pinili,* ti

pagilian a napnuan ‘ti parmata,

kenkuana adda pay sudit’ sirmata,

pagilian ti maingel a puli.

maingel man ni i-pinili ngem

adda kenkuana ‘tay urbanidad,

itangtangsitna ti puon, pati

gapuanan a gubuayan ‘tay raem.

ugalina di a gumarugad,

kinapakumbabana adda’t sipi.

*nagbalin a maika-17 a minisipio ti ilocos

norte ti pinili idi maika-1 ti enero 1920

babaen ti orden ehekutibo ni gobernador

heneral francis burton harrison.