Dapo
limmabaska kaniak
iti apagdarikmat
ket ti lawagmo a limgak
sinairna man dagitoy matak;
awan man ti alikakam:
pusok inka siniram
ngem apaman a nakalikudka
dimmapo metten ‘toy kararua.
Paslep
natirad a paslep
a pinetpetan nabaneg nga ima:
naitaneb iti mangliwengliweng
a kaunggan ti sipnget…
naminsan… namindua–
simminan ni kararua.
–J. B. QUIMBA
(Immuna a naipablaak iti Bannawag iti Septiembre 23, 1946 a bilang.)
