Lumablabagan ‘Diay Pinkpinkda, Ay!

Lima a Daniw ni HONOR BLANCO CABIE

1

adda kayat a mapasingkedan

ni dan ‘ti innaldaw nga aramidna:

nagsursursor ‘diay google napanan.

adut’ saludsodna kayatna man

a tiliwen wenno tukmaanna

sungbat saludsod ‘diay nalablabsan.

saanna nga ammo imbilangdan

a nakikaduan ‘diay sinapulna –

pannakakigtot nga aplaw adda.

anian natalimudawen ni dan,

nakigtot mugingna ken karkarma,

sursorna’t google ta imbilangdan.

kas man la an-annong dayta ken’ dan,

ay! ngem agimbag no gulgolanda,

santiguarna ‘ti google napanan.

adda kayat a mapasingkedan

ni dan ‘ti innaldaw nga aramidna:

nagsursursor ‘diay google napanan:

pati karkarmana inwalangdan.

2

panagpasiarda ‘ti tunggal balay,

derosas natayengteng ‘tay aruat,

mensaheda daytay kumumkumpay,

lumabasda ‘diay langit ta mabriat.

asino kan’ ibotosda? ay! ngem

no di ‘diay ikamkampaniada ‘tay

mangngeg maregregdan panagraem:

ta bobo kan’ botante ‘diay balay.

dayta ‘tay karitda a di umdas,

saanda a bukbukod ‘tay imbag,

pudno rumbeng la unay ‘tay apras,

koma marukrokda ken mayuldag.

adda ‘tay durek ‘diay lapayagda,

awan sabalin a mangmangngegda.

3

‘isar-ongmot’ bagim ditoy balay,’

kunan’ badong a dagus nanglukat

‘diay ruangan kurangna la agtaray

‘ti kinapinktasda adda rimat.

mensahe dagiti agkutkutak

denggen met ni badong, ugalina

dayta, ay! ngem addan ‘tay simmipat

‘ti bukodna a muging ken rikna.

nagtayyek dagus ti panunotna

idi isun mainsulto, gapu

ngamin sabali ‘diay ibotosna –

nasemsem ket kayatnan mangbullo.

ania ti bibiangda ngamin no ‘tay

sabali ‘tay kayat? ay-ayda pay.

4

kasinwatiwat naga ken batac*

kaadayot’ pangitartarayan

daydiay mairurumen ken ‘diay saan –

kunada a nagpinktastot’ bigat.

adda pay ‘tay impaskilda, kano

nagmartsa kan pasurotda sadiay

ilocos sur napan ‘diay norte, ay!

anian nga arapaap, ‘tanudko.

dayta sibubukel a babato

ni samtoy ta kano naburaken,

sinakupen ni balo ‘diay lugar,

addan am-amangawda ‘ti ungto.

awan met ‘tay limmabas a pangen –

‘diay utekda batibat ‘tay rimmuar.

*850.6 a kilometro manipud naga, camarines

sur agingga ‘diay batac, ilocos norte babaen

ti pan-philippine hwy/ah26 ken macarthur

hwy/manila north road.

5

ay! dida a pulos a sardengan

pananginsulto’t kinataona:*

tarkok pagturedanna ‘tay awan,

adda iti debate al-alia.

kayat adda bibingkana daytay

panagdebateda kano koma

ngem di met a pagustuan ni lakay –

riknan nangawis ta naraprapa.

ita ta di met a pulos denggen

ni apot’ awis ni madukotan

‘diay buyot maikadua rimmamanen –

adun agballa ken nayaw-awan.

lumablabagan ‘diay pinkpinkda, ay!

makapkapungtotdan, ay-ayda pay.

*daydiay barag #MarcosDuwag (#MarcosTarkok)

nakabulos manen iti social media idi di pagustuan

ni ferdinand marcos jr. ‘diay karit ni leni robredo

nga agdebateda – isuda laeng – iti ania man a kanito,

sadinno man a lugar, mano la nga aldawen sakbay

ti panagpipili inton maika-9 ti mayo iti daytoy a tawen.