Ni ARGYLL CYRUS GEDUCOS
Innagananen ti Malakanyang dagiti kameng ti Presidential Transition Committee (PTC) tapno masierto ti naannayas a pannakayakar ti turay iti sumaruno nga administrasion.
Maibatay iti Administrative Order (AO) No. 47 a pinirmaan ni Executive Secretary Salvador Medialdea itay Mayo 10, idauluan daytoy ti PTC a pagkamengan dagiti sumaganad:
- Foreign Affairs Secretary Teodoro Locsin Jr.
- Finance Secretary Carlos Dominguez
- Budget Undersecretary Tina Rose Marie Canda
- Socioeconomic Planning Secretary Karl Chua
Iti panangipaulogna iti AO, inanamongan ni Presidente Duterte ti pagannurotan ti gobierno a mangisayangkat kadagiti amin nga umisu a pamuspusan tapno manamnama ti natalinaay, naurnos, ken naannayas a pannakayakar ti turay iti sumaruno a nabotosan a presidente.
Nailanad iti AO a ti nabotosan a presidente ken dagiti agbalin a kameng ti gabinetena, maipaayanda iti umdas a suporta ken tulong manipud iti masukatan a gabinete tapno maiwanwan ti panagtugaw dagitoy.
Nailanad pay iti nasao nga AO a masapul a maparnuay ti Transition Committee a makitinnulong kadagiti pannakabagi ti nabotosan a president tapno masigurado ti umisu ken naurnos a transision iti sumaruno nga administrasion.
Malaksid iti pangulo ken kameng ti PTC a mangasistir ken mangsuportar iti daytoy a gannuat ti Presidente, tumulong pay ti Office of the Cabinet Secretariat ken ti Presidential Management Staff a mangipaay iti teknikal ken sekretarial a tulong.
