4

Uppat a Daniw ni HONOR BLANCO CABIE

1
panagpaklebna 'ti barukongko
iparangarangnat' talnana, 'tay
laem salaknibna ken linglingay,
mangted panagragsak 'toy mugingko.
panagpitikpitik ti pusok ta
napasnek 'tay panangikarkari
a di mabaybay-an 'ti rabii:
mamagtalna 'diay muging ken rikna.

pagsinnublatennat' lapayagna
a mangdengngeg panagpitikpitik,
panagang-anges 'toy barukongko,
'diay turog ti apok imasenna.
paklebna 'ti barukongko sam-it
sumuknor 'toy riknak ken mugingko.

2
kaduak a musiko't immun-una
a panawen awan mailasinko
kada agtoktokar 'ti agdama,
awan maysa innak nga am-ammo.

ay! agpapada met ti ayugmi
ngem ni maysa kaniak pulos awan
'tay kumablaaw, siak maipakpakni,
panagriknak 'siak 'tay nayaw-awan.

'tayo agtokar padasek met koma
toktokarenda ta kabaelak,
awan mangipasublat iggemda,
adda sumagsagirad 'toy matak.

pinili met pay la daytoy, manen
maitalamitimko iti pangen.

3
asinno dagiti mangtamtambang
kaniak, ammok narungsot ken pulos
daytay kaasida kaniak awan,
kas man saanda kaamak ti dios.

aglemlemengda ‘ti innak makan,
kadagiti nagalip a sidak,
pulat’ kappi, apgad nga adda’t pinggan,
mangted panagpilpilayko’t danak.

kunak saanakton a magmagna
‘ti asideg ti ngiwat rangkis ‘diay
bantay, ta amangan kunak adda
sadiay ‘tay mangsaed mangted liday.

lisiak ida tapno daytoy dapan
adda salun-atna’t pagpagnaan.

4
no oberturan franz* daytay innak
patokaren ‘ti CD nga iti
siled adda mailut ‘toy bagi
ket mapaamo met daytoy riknak.
kasla ullawak maitayok idiay
ngatuen barukong kabakiran yan
ginasgasut a nagpayak, anian
kasla agsuekak ‘diay pus-ong bantay.

idi kinaganus adda kaniak
nagayyemko ni franz, masansan ‘diay
yanko no agtokarkami idi,
kunam la no ‘diay langit mabmabriat.
ngem ‘tay pianismo makalinglingay,
kaarignat’ panagkalmat’ bagi.

*franz von suppé wenno francesco suppé
demelli (abril 18, 1819 – mayo 21, 1895),
maysa nga austriano a kompositor ti “light
operas” manipud ‘diay pagarian ti spalato,
paset ti croatia itan. mabigbig gapu kadagiti
uppat a dosena nga operetta a gapuananna.

(Ladawan: Pammadayaw ti Unsplash)