Valente, Umuna a Gunggona iti Palanca Awards 2022 iti Benneg ti Sarita nga Ilokano

Inyalat ni Oswald A. Valente ti Umuna a Gunggona iti 70th Carlos Palanca Memorial Awards for Literature (2022) iti Short Story-Ilokano Category.

Naangay ti seremonia ti pammadayaw iti Bonifacio Global City, Taguig City itay Nobiembre 30, 2022.

Kadua ni O.A. Valente, tubo ti Currimao, Ilocos Norte, a nangabak da Remedios S. Tabelisma-Aguillon ti Cagayan de Oro City, Maikadua a Gunggona; ken Rodolfo D. Agatep Jr. ti Banayoyo, Ilocos Sur, Maikatlo a Gunggona.

Nagpaay a kameng ti hunta dagiti hurado da Cles B. Rambaud (pangulo), Linda T. Lingbaoan-Bulong (kameng), ken Joel B. Manuel (kameng).

70TH PALANCA AWARDS/ SIUDAD TI TAGUIG. Ni Oswald A. Valente iti pannakapadayawna iti panangyalatna iti Umuna a Gunggona iti Short Story-Ilokano Category ti 70th Carlos Palanca Memorial Awards for Literature. Naangay ti seremonia ti pammadayaw iti Bonifacio Global City, Taguig City idi Nobiembre 30, 2022. Kadua ni O.A. Valente, tubo ti Currimao, Ilocos Norte, dagiti nangibagi iti Carlos Palanca Foundation a da (agpakanigid) Carlos Palanca IV, Criselda “Dang” Cecilio-Palanca, ken Nemesia Bermejo; ken ti Chairman ti Board of Judges, Short Story-Ilokano Category, Cles B. Rambaud ti Bannawag. Kadua ni O.A. Valente a napadayawan da Remedios S. Tabelisma-Aguillion ti Cagayan de Oro City, Maikadua a Gunggona (imbagian ni Marjoury Aquino-Agatep; ladawan iti baba); ken Rodolfo D. Agatep Jr. ti Banayoyo, Ilocos Sur, Maikatlo a Gunggona (akimbaba a ladawan). Saan a nairaman dagiti dua pay a nagpaay a hurado, da Linda T. Lingbaoan-Bulong ken Joel B. Manuel. (Rinetrato ni Marlon A. Rodrigo)

Maysa a mannalon ni O.A. Valente. Dati a Preacher ken mamagbaga ita iti lokal nga iglesia a nakaikappenganna. Nagpapaay a Punong Barangay ti barangayda (Comcomloong). Nairaman dagiti dadduma a sinuratna iti Bannawag, Valley Journal, Cronicas, Ilocos Times, Silnag Magazine, ken nadumaduma nga antolohia dagiti sarita ken daniw iti Ilokano. Nairaman payen dagiti sinuratna iti Ani39 ken Ani40, Book Project ti Cultural Center of the Philippines (CCP). Naipasngay idi Agosto 5, 1963. Kaingungotna ni Evangeline P. Quibin ti Dariwdiw, Batac City; ken anakda ni Hannah Abigail.  

Naipasngay ni R.S. Tabelisma-Aguillon iti Diaz, Umingan, Pangasinan idi Hulio 2, 1944 kada Alejandro Vergara Tabelisma ken Rosalia Diego Salvador. Dimmakkel iti Almaguer (South), Bambang, Nueva Vizcaya, a nakasursuruanna nga agbasa iti Bannawag. Immakar ti pamiliada iti Marbel, Koronadal, South Cotabato idi 1957. Kas kunana, “nasapa a nayanakak ngem naladaw a nagnakemak ta sa laeng nangrugi a nagsuratak idi 2015, walo a bulan kalpasan a pimmusay ni lakayko, tapno mailiwliwagko ti nakana a leddaangko.” Lima dagiti annakna (dua a babbai ken tallo a lallaki) ken walo dagiti appokona nga ibilangna a kapapatgan a gamengna. Iti agdama, agnanaed iti Upper Carmen, Cagayan de Oro City iti sidong ti maysa kadagiti annakna.

Naipasngay met iti Banayoyo, Ilocos Sur ni R.D. Agatep Jr. kada  Rodolfo Agatep Sr. ti Santa Maria ken Laarni Decano ti Banayoyo, Ilocos Sur. Nagturpos iti Bachelor in Elementary Education ken addaan iti Master’s Degree in Administration and Supervision. Nangisuro iti eskuela elementaria iti ili ti Banayoyo, nagbalin nga OFW iti Kingdom of Saudi Arabia a kas IT Consultant kalpasanna ken nagsubli a nangisuro iti North Luzon Philippines State College a kas Instructor ken nagserbi a Program Chairman ti College of Teacher Education. Naglusulos iti trabaho ket nakipagbuangay iti eXon infotech solutions a mangipapaay iti IT/ICT Consultation Services iti pagilian pakairamanan iti ballasiw-taaw. Naikamang iti ili ti Narvacan, Ilocos Sur ken ni dati a Marjoury Aquino ken addaanda iti tallo nga annak. Kunana: “Ipagpannakkelko ti pannakapilik met idi a fellow ti Pasnaan, ti literary workshop ti GUMIL Filipinas a para kadagiti agdadamo a mannurat iti lengguahe nga Ilokano.”