Dean Pablito F. Sanidad Jr., nayendorso a mangidaulo iti NCIP iti Region 1 ken CAR

Nagkaykaysaan nga inyendorso ti Baguio City Council ken ni Presidente Ferdinand Marcos Jr. ti pannakadutok ni dati nga Ilocos Sur Board Member Pablito  “Sonny Boy” F. Sanidad Jr. a mangidaulo iti National Commission for Indigenous People (NCIP) ti Region 1 ken iti Cordillera Administrative Region (CAR).

Iti panangyendorso ti Baguio City Council ken ni Atty. Sanidad, anak ti Ilokano ken  Bontoc-Ibaloi ken three-termer a kameng ti hunta probinsial ti Ilocos Sur, dinakamat ti konseho nga addaan daytoy iti naan-anay a kabaelan a mangidaulo iti NCIP CAR/Region 1

“Maiparbeng la unay ta maysa a natakneng a tao ken addaan iti kredibilidad ni Sonny Boy nga agbalin a commissioner ken a mangidaulo iti NCIP CAR ken Region 1,” kinuna pay ti Baguio City Council.

Innayon ti City Council a naikawes ken ni Atty. Sanidad Jr. ti sirib ken regget a mangiwayat  kadagiti addang tapno makorehir dagiti historikal nga inhustisia a sinagrap dagiti indigenous people wenno katutubo.

“Makatulong iti dakkel ti kualipikasionna a kas mabigbig nga abogado ken kas nagbokal iti Ilocos Sur iti pannakaitandudo ti pakaseknan ti NCIP,” kinuna pay ti resolusion.

Innayon ti City Counci, buklen dagiti dadduma a kameng ti Ibaloi, Kankannaey, ken Ibanag ethnic groups, a makatulong ti pannakadutok ni Sanidad Jr. iti Marcos Administration ken iti NCIP aglalo itoy a panawen a masapul ti reorganisasion ti ahensia.

Anak da Mayor Pablito Sanidad Sr., mayor ti Narvacan, Ilocos Sur ken ni sigud a Susan Fianza ti Bauko, Mountain Province ken Kapangan, Benguet ni Bokal Sanidad Jr.

Tinurposna ti Mass Communications iti UP Diliman ken ti abogasia iti Ateneo Law School a nakagun-odanna ti Juris Doctor.  Inleppasna ti Masters of Law iti San Beda College ken madama nga ilepleppasna ti Masters in Public Administration iti UP Diliman.

Natenneb nga abogado, nagkameng kadagiti nalalatak a bupete sakbay a binangonna ti bukodna a law office nga addaan iti sanga iti Baguio, Ilocos Sur ken Metro Manila. Nagkameng ni Atty. Sanidad Jr. iti Free Legal Assistance Group (FLAG) ken nagisuro iti Law iti UP ken iti University of Baguio a pagpapaayanna ita a Dean ti School of Law. (Eliseo B. Contillo)