Balangkantis nga Ayat

Daniw ni NORMA S. SUGUI

Iti panagayamuom dagiti sabong
A dinanggayan yiisem dagiti bituen
Nagtedted linnaaw a kasam-itan
A mamagrusing rikna a nakarayoan.

Nagkanta a siraragsak ‘toy pusok
A dinanggayan naumbi a kutibeng ‘ta pusom
Iti panagsala dagiti darikmat
Naglinged a siaapal ti bulan.

Iti apagdarikmat rimkuas ti katawam
A nangpugsat kuerdas ni lailo
Ken nangpunas naruay a kari ken sapata
Ket natdaak nga agmaymaysa iti nagpasaganta.

Ngem diak sangitan ti imbatim a pait
Ibilangko a pagwadak iti dalan
Tapno saanakton a maallilaw
No dumteng sulisog balangkantis nga ayat.

(Immuna a naipablaak iti Enero 11, 1971 a bilang ti Bannawag.)