Inispal dagiti kameng ti 9th Infantry Division (ID) ti nasugatan a daulo ti New People’s Army (NPA) dua nga aldaw kalpasan ti panagrarangetda iti Sitio Madarag, Barangay Jagnaan, San Jacinto, Masbate, a nakatayan ti maysa pay a daulo ti NPA a nairaman iti pannakapapatay ti FEU football player.

Segun ken ni Major Frank Roldan a pannakangiwat ti 9th ID, nasarakan dagiti soldado ti 96th Infantry Batallion (IB) ni Ramon Bartolata (alias “Jamon”), commanding officer ti Platoon 3, Komiteng Larangang Gerilya North, Sub-regional Committee 4, Bicol Regional Party Committee, iti asideg ti lugar a nagrarangetanda.

Saan a makapagna ni Bartolata gapu iti adu a sugat a gapuanan ti paltog ken pannakaimpeksion daytoy.

Kinuna ni Roldan, naglemmeng ni Bartolata iti asideg ti lugar a nagrarangetanda, ket nangnamnama a dagiti kakaduana ti mangispal kenkuana. Ngem dagiti militar ketdi ti immay nangalaw ken ni Bartolata.

Manipud iti Masbate, intulnog ti 96th IB ni Bartolata iti Albay tapno maipaagas.

Impanamnama dagiti opisial ti 9th ID a maipaayan ti tulong ti nadangran a daulo ti NPA, idinto a dinayaw ni Major Gen. Adonis Bajao a hepe ti 9th ID, dagiti soldado gapu iti tarigagayda a mangpasardeng iti panagrebelde iti masakupanda ken iti panangraem dagitoy iti kalintegan a kas tao (human rights). (Nino N. Luces/Manila Bulletin.)