Lalaki a nangpapatay ken ni Jullebee Ranara, nasentensiaanen

Pammadayaw ti pna.gov.ph
Ti bangkay ni Jullebee Ranara a nayawid iti Filipinas idi Enero 2023.

Sinentensiaan ti korte ti Kuwait ‘tay nangpapatay ken ni Jullebee Ranara, maysa nga Overseas Filipino Worker (OFW) a rinames, pinapatay, ken pinuoran ti lalaki nga anak ti amona idi Enero.

Kinuna ni Department of Foreign Affairs (DFA) Usec. for Migrant Affairs Eduardo Jose de Vega itay Septiembre 14, inyetnag ti Juvenile Court of Kuwait ti sentensia ni Turki Ayed Al-Azmi, 17, a pannakabalud iti 15 a tawen ken nayon a 1 a tawen gapu iti panagmanehona nga awanan iti lisensia.

Agtawen iti 35 ni Ranara nga OFW iti Kuwait, ngem nasarakan ti nauram a bagina iti desierto nga asideg iti Al-Salmi Road idi Enero 21, 2023.

Kinuna ti Kuwaiti media a segun iti autopsia nga inaramid dagiti autoridad ti Kuwait, masikog ni Ranara idi napapatay daytoy.

Kinuna ti DFA, nalag-an ti naipataw a dusa iti nangpapatay gapu ta menor de edad daytoy. (Joseph Pedrajas/Manila Bulletin.)