Ti Land Cruiser a nagluganan daydi dati a gobernador ti Pangasinan a ni Amado Espino Jr. idi sinaneb ken pinapatay dagiti armado a grupo idi Septiembre 11, 2019. (Ladawan: Pammadayaw ni Enzo Austria Jr. ti pna.gov.ph.)

Tiniliw dagiti kameng ti polis ti maysa kadagiti maatap a nangpapatay ken ni dati a gobernador ti Pangasinan a ni Amado Espino Jr. idi 2019.

Imbatad ni Pangasinan Police Provincial Office Chief Police Col. Jeff Fanged a naaresto ni Arnulfo Cerezo Alipio (alias “Anong”) iti pagtaenganna iti Naguilayan, Binmaley.

Maibilang ni Alipio kadagiti kalatakan a kriminal ken dati a kagawad ti Binmaley, idinto a kameng ti nalatak a Sison Group ken Potential Private Armed Group (PPAG) a patangtangdanan tapno agpapatay saan laeng nga iti Pangasinan, no di kadagiti pay kabangibang a probinsia.

Sapsapulen dagiti pannakabagi ti linteg ni Alipio gapu iti kaso a pammapatay (murder), natungday a pammapatay (frustrated murder), ken gandat a pammapatay (attempted murder) mainaig iti pannakasaneb ni Espino.

Tiniliwda ni Alipio iti bileg ti Warrant of Arrest nga impaulog ni Presiding Judge Magnolia V. Cayetano ti Regional Trial Court, 1st Judicial Region, Branch 56, San Carlos City, Pangasinan, idi Pebrero 15, 2021. (Liezle Basa Iñigo/Manila Bulletin//Lito P. Hilidon/Bannawag.)