Innadal ti GUMIL Filipinas, Panagkayas kadagiti Balikas ti GUMIL Cagayan, Maisayangkat

Babaen ti nagkaysa a liderato ti Gunglo dagiti Mannurat nga Ilokano iti Filipinas (GUMIL Filipinas) nga idauluan ni Ariel Sotelo Tabag ken ti Gunglo dagiti Mannurat nga Ilokano iti Cagayan (GUMIL Cagayan) nga idauluan ni Rolando A. Seguro Jr. ken iti pannakitinnulong ti gobierno munisipal ti Santa Teresita, Cagayan nga idauluan ni Mayor Rodrigo P. De Gracia, maisayangkat ti “Innadal/Panagkayas kadagiiti Balikas: Seminar iti Lengguahe ken Literatura nga Ilokano” inton Oktubre 14, 2023 iti Municipal Gymnasium ti Santa Teresita.

Serye ti seminar iti ortograpia ken gramatika ti pagsasao nga Ilokano a programa ti GUMIL Filipinas ti “Innadal” idinto a serye ti seminar-workshop iti lengguahe ken literatura nga Ilokano a programa ti GUMIL Cagayan ti “Panagkayas kadagiti Balikas.”

Agpaay a lektiurer dagiti premiado ken mabigbig a mannurat iti Cagayan a da Rolando A. Seguro Jr. (Daniw Para Ubbing), Raquelito B. Cenal (Ortograpia nga Ilokano), Ariel S. Tabag (Sarita a Para Ubbing), ken Arthur P. Urata Sr. (Introduksion iti Radio Broadcasting ken Panagsurat iti Damdamag).

Maiwaras pay iti nasao a pasken dagiti kopia ti “Tarabay iti Ortograpia ti Pagsasao nga Ilokano” a nagtinnulongan nga inruar ti Komisyon sa Wikang Filipino, GUMIL Filipinas, ken Bannawag.

Malaksid iti seminar-workshop, maiwayat pay ti panagmula iti kayo, a pagtinnulongan nga isayangkat ti GUMIL ken ti gobierno munisipal ti Santa Teresita, iti maysa kadagiti barangay ti nasao nga ili.

Adda registration fee a PhP100 para iti seminar-workshop a mangrugi iti 8:00AM agingga iti 3:30PM. Limitado laeng dagiti maawat a partisipante isu a maiwayat ti pre-registration. Kadagiti interesado, kontaken ti Municipal Public Information Office ti Santa Teresita babaen ken ni Edison B. Tobias iti numero a 09362884338. (Levie Baldugo-Baclig)