Saan pay a ma-phase out dagiti tradisional a dyip — LTFRB

Inlawlawag ni Land Transportation and Franchising Regulatory Board (LTFRB) Chairperson Teofilo Guadiz III itay Nobiembre 16 a saan pay a ma-phase out dagiti tradisional a dyip iti pagilian uray malpaston ti deadline ti konsolidasion ti prangkisa dagiti Public Utility Jeepney (PUJ).

Kinuna ni Guadiz a masapul a malpasen ti konsolidasion dagiti prangkisa inton Disiembre 31 daytoy a tawen, ngem dina kayat a sawen a saanen a mapalubosan nga agbiahe dagiti kadawyan a dyip iti arinunos ti tawen.

Innayon ni Guadiz a maibilangen a nakatungpal (compliant) dagiti nangipila ken nakakompleton iti rikititos uray saan pay a naiproseso dagitoy, ket mabalindan ti agbiahe iti naituding a ruta.

Idinto a maikkanda iti 27 a bulan tapno mabaliwan manipud iti tradisional agingga iti moderno a dyip, indagadag ni Guadiz kadagiti mangipaspasada iti tradisional a dyip nga usarenda a naimbag ti nailatang a panawen ta mabalinda latta ti agbiahe agingga nga ideklarar ti LTO a “roadworthy” ti dyipda.

Innayon ni Guadiz a saan a pudno dagiti maiwarwaragawag a nasken a mapabaro ti dyip iti las-ud ti 3, 6, wenno 9 a bulan. Innayonna pay nga awan ti ma-phase out a dyip.

Segun iti LTFRB, nakonsolidaren ti 60 porsiento dagiti PUJ iti pagilian, ket namnamaenda a maipatungpal iti agdama nga administrasion ti Public Utility Vehicle Modernization Program (PUVMP). (Jel Santos/Manila Bulletin//Lito Hilidon/Bannawag)